Lili Berlin (Galego)
Blanca
Cendán, Carlos Ariel e Suso Alonso recuperan a linguaxe dos
cabarets para os escenarios galegos. Fixo falla un pauto co demo, un
tratado de inmortalidade, para que ela e os seus compañeiros,
Karls e Berg, chegasen ás salas e ós teatros. Coma
Fausto vendéronlle a súa alma ó diaño
pero iso é só o comezo dunha aventura histórica
e musical que comeza no século XIX e desemboca, estes días,
nun dos espectáculos máis brillantes da escena
alternativa galega. Blanca Cendán, Carlos Ariel e Suso Alonso
son os actores e tecedores dun fío narrativo, sempre aberto e
en contínua mudanza, que percorre a historia de Lili Berlín,
unha diva extemporánea e algo louca, que é, tamén,
testemuña privilexiada dos séculos nos que asenta a
cultura e expresión contemporánea europea. Precisamente
no corazón de Europa, —nese Berlín berce do cabaré
no que Blanca Cendán traballou como actriz e cantante—,
xurdiu este divertimento que, tralos dúos iniciais con Suso
Alonso, pianista e compositor vigués de dilatada traxectoria
no mundo teatral—, e a incorporación de Carlos Ariel,
chelista, colaborador da Sinfónica de Londres, adquiriu o peso
dun relato, un conto que a propia Lili lles relata ós seus
espectadores. O
banda sonora dese relato consiste, principalmente, no cabaré
alemán dos anos trinta, as composicións de Kurt Weill
ou Hans Eisler, con textos de Brecht, que iluminaron aquel Berlín,
centro de operacións da arte e da expresión creativa de
entreguerras. Da fonte inesgotable do cabaré bebe o espírito
deste espectáculo, que medra na ironía, no humor, na
militancia libertaria, na improvisación, na ambigüidade e
na crítica política e social que fixo do xénero
a arma de combate dos intelectuais alemáns fronte ó
nazismo. Faino Blanca Cendán en alemán (tamén en
inglés, español ou galego) co rexistro, —o de
mezzosoprano—, que mellor lle acae ás cancións de
Weill, situando á súa Lili no ronsel de divas coma a
Dietrich ou Lotte Lenya, sobre un leito de arranxos musicais no que
se albiscan as mans de Alonso e Ariel. Lili
Berlin Cabaret avala súa traxectoria con mais de 200
representacións pola península Ibérica,
Portugal, Andalucía, pasarela Gaudí de Barcelona,
Canarias, e Galicia onde recentemente deron una mostra de exquisito
cabaré ca colaboración de Druída Danza, durante
a Gala de Premios de Teatro María Casares 2008, retransmitida
pola TVG dende o Teatro Rosalía de Castro da capital Coruñesa.
